தனது பிறந்த தேதியை ஏற்காத மத்திய அரசை எதிர்த்து, ராணுவ தளபதி வி.கே.சிங், சுப்ரீம் கோர்ட்டில் வழக்கு தொடர்ந்துள்ளார். சுதந்திரம் அடைந்த இத்தனை ஆண்டுகால வரலாற்றில் ஒரு ராணுவ தளபதி மத்திய அரசை எதிர்த்து கோர்ட்டுக்கு சென்றிருப்பது இதுவே முதல் முறையாகும் . நம் நாட்டின் ராணுவ தளபதியாக உள்ள, வி.கே.சிங் பிறந்த தேதியில் சர்ச்சை நிலவுகிறது. இவருடைய மெட்ரிகுலேஷன் பள்ளி சான்றிதழில் பிறந்த தேதி, 10.5.51 என்றும், இவரை தேசிய பாதுகாப்பு அகடமிக்கு தேர்வு செய்ய, யு.பி.எஸ்.சி., நடத்திய நுழைவுத் தேர்வு விண்ணப்பத்தில், 10.5.50 என்றும் குறிப்பிடப்பட்டுள்ளது.எனினும், தன் பிறந்த தேதி, 10.5.51 என, வி.கே.சிங் வற்புறுத்தி வருகிறார். ஆனால், இவரது கருத்தை ராணுவ அமைச்சகம் ஏற்கவில்லை. இதையடுத்து, வி.கே.சிங், வரும் மே, 31ல் ஓய்வு பெற வேண்டியுள்ளது. தன் பிறந்த தேதியை ஏற்க மறுக்கும் பாதுகாப்பு அமைச்சகத்தின் செயலை எதிர்த்து, வி.கே.சிங். சுப்ரீம் கோர்ட்டில் நேற்று ரிட் மனு தாக்கல் செய்துள்ளார். வி.கே.சிங்கின் சார்பில், அவரது வழக்கறிஞர் யு.யு.லலித், இந்த மனுவை சுப்ரீம் கோர்ட்டில், தாக்கல் செய்தார்.
"எனது பிறந்த தேதி பிரச்னை, கவுரவம் மற்றும் ஒருமைப்பாடு சம்பந்தப்பட்டது. 10.5.51 என்ற தேதியின் அடிப்படையில் தான் கடந்த, 36 ஆண்டுகளாக ராணுவத்தில் பல்வேறு பதவிகளை பெற்று சேவையாற்றி வந்துள்ளேன். இப்போது ஏன் எனது தேதியில் அரசு மாற்றம் செய்கிறது?' என, வி.கே.சிங் தனது மனுவில் குறிப்பிட்டுள்ளார். நாட்டின் ராணுவ தளபதி பதவியில் உள்ள ஒருவர், அரசுக்கு எதிராக வழக்கு தொடர்ந்துள்ளது, முன்னர் எப்போதும் நடந்திராத விஷயமாக கருதப்படுகிறது.
கருத்துகள் இல்லை:
கருத்துரையிடுக